Col 2 | ATA | STEP | Eni emasaxa lexe ngingi ngalavusou lexe eni axaxai xavileli manina mo atoxavisilo sou asu'ulingengi xe ta mitema ta temanu lalotu no tuala tila ne Laodekia xe ta mitema ane imaisilo xe ilavusilo uasi.

a 2:31Ko 1:24, 30

b 2:4Rom 16:18

c 2:51Ko 5:3

d 2:7Ep 3:17

e 2:9Ioa 1:14, 16

f 2:10Ep 1:21-22

g 2:11Rom 2:29

h 2:12Rom 6:4

i 2:13Ep 2:1, 4-5

j 2:14Ep 2:14-16; 1Pi 2:24

k 2:16Rom 14:1-13

l 2:17Eva 8:5

m 2:19Ep 2:21, 4:16

n 2:20-21Xal 4:3, 9; 1Ti 4:3

o 2:22Mat 15:9

Colossians 2

1 Eni emasaxa lexe ngingi ngalavusou lexe eni axaxai xavileli manina mo atoxavisilo sou asu'ulingengi xe ta mitema ta temanu lalotu no tuala tila ne Laodekia xe ta mitema ane imaisilo xe ilavusilo uasi. 2 Eni a'oxonu aloxo ne mo sou lexe aavutilingenge mo a'oxonu pekia'inge no anu 'ilixo sou ngamasaxainge manina mo tanengingenge ngatongato'o mo opongengi vilesisi, mo sou eni emasaxa lexe ngingi ngano'u xavutala laixe la u'oxonu muxamuxaxu tangengi pekia'u, mo ngalavusou vaikala noxou Lataua e mutalume ne. Vaikala noxou Lataua e mutalume ne ane Kalisito nesi. 3 ^aXavutala mo lavulavu lailaixe mukalusi e mutalume ne mu'ana'ana noxou. 4 ^bLa sou eni avikalangengi lexe mamu sou itema vile une'e usiasia'u vaivaikala lailaixe sou ukalavoingengi la u'oxo lolongenge. 5 ^cManina no vasimenge la nenge'a taxolu tapita uasi, ia no anu xavutalaxeni la anu loxo eni a nenge'a taxoxolu ne, mo e'osa sou emaisinge ngexaxai laixe xe ngemuxaxu tangengi pekia'u noxou Kalisito.

Nenge Taxolu Noxou Iesu La Tano'u Mauli Lololinu

6 Ngingi ngeno'u Kalisito Iesu loxo Tila noxinge la sou anu laixe lexe ngamulinu utotomu. 7 ^dMo ngasiatoto noxou loxo ovu uli'u muleme mulai musiatoto no lia, mo loxo tani mutulu no anu atolaxu pekia'u. Xe ngamuxaxu tangengi pekia'u no anu a'alo laixe e nexi taa'aloxu ne, la ngelemo laixe.

8 Ngasaxila'inge laixe loxo 'o io itema vile une'e u'oxo lolongenge no anu a'alo kalakalavoi mose'i la u'oxongengi ngamulinu lavulavu noxi'a ta mitema. Ta mitema aloxo ne mimulinu xavutala noxi'a ta xaixasinge tatei xe ta uleenu e ilavusou isaxila'u mimii teitexi xe no lialia 'o, ia imulinu xavutala noxou Kalisito uasi.

9 ^eNenge telavusou lexe Kalisito anu muxali itema loxo nenge 'o ia Anu muno'u maulixu lololi noxou Lataua. 10 ^fLa sou Anu muxolu kisi'a ta mimii mukalusi e xavine'i mo ane'i ane mino'u xavi sou ixaxai. Ia ngingi ne noxou Kalisito la sou Lataua mulosinge mauli lololinu e mu'ana'ana manina. 11 ^gNgingi ngexolu noxou la ngingi kalumo xooxoo mungasinge. Xooxoo mungasinge ne no anu 'ilixo noxi'a ta mitema i'oxonu no vasimenge uasi. Noxou Kalisito la nenge texexeenu 'ili'ilixo masumasua sou opo teinu. La sou no anu 'ilixo ane nesi la sou anu muxali loxo vote'i maninasou sou xooxoo ungasinge. 12 ^hMo no mine ngekelele sou mi'ulosinge la anu loxo mi'asingenge ngongi'a Kalisito mukei. Xe no mine ngingi ngemuxaxu tangengi no anu tulu noxou Kalisito xe ngelai ngekelele sou mi'ulosinge, la no anu xavi noxou Lataua e mutulusou Kalisito la anu loxo ngingi ngongi'a Kalisito ngetulu ngekei.

13 ⁱTei no mine ngemulinu masaxa masumasua sou vasimenge la nge'oxo'oxonu 'ili'ilixo masumasua xe xooxoo ungasinge uao, la anu mu'oxongengi ngesoisoli. Ia Lataua mulosinge ngongi'a Kalisito mauli xe mululusou susu noxinge mukalusi. 14 ^jMo nenge tamulinu lapuloto noxou Mosesi laixe uasi la anu muxalixu muatu lamana lexe nenge tesusu xo nenge tamulinu muamua'ixu xe vote'isou uasi, la sou nenge tatulu no anu vaivaikalasou. Ia Lataua muxexeenu vaikala sou lexe tatulu no anu vaivaikala ne mo muxexeenu xaviinu lapuloto ne la mulilinu teiteixi no ovu valautu noxou Kalisito. 15 No anu xavi no anu ovu valautu ne Lataua mukalusou xavi noxi'a ta uleenu ilo'a ta mimii ane xavine'i mu'oki, la muai lamana no ie'i ta mitema lexe Anu mua'ulixa'a xe ane'i xavine'i uasisi manina.

16 ^kAloxo ne la sou mamu sou itema vile une'e upela'inge lexe la'ilali ane 'o nga'ou xe ngaiexu lexa ane 'o xo lapuloto muvikala aloxo ne. Mo upela'ingexu voxo tavuna sou lalotu mo pitapita ta tatila sou so'io alavua xe voxo sou lalotu no anu voxo muxatele ta tamei. 17 ^lXo mimii mukalusi ne, anu tovola'isou mii ma'ia ane sou uxali ili'isi. Ia Kalisito anu mii maninasou. 18 Mo lexe itema vile ua'alomengi no anu mii vile anu mumaisou no anu aipiepiena noxou mo uvikalangengi lexe ngingi ngataloxolingenge mo ngalotu noxi'a ta angelo, la mamu sou ngalomuxu xo utaloxolingenge. Xo itema ane loxo ne xavutalau ne mu'ana'ana no anu masaxa sou opo teinusi, la utovonu lexe anu itema sou lavulavu manina. 19 ^mItema ane loxo ne, anu utoxo noxou Kalisito anu muxali kisinge uasi. Xo nenge tetoxo no anu kisinge ne la vasivasimenge uno'u 'ani ane, la sou u'oxonu toxotoxo no xinexinenge ilou le'ele'esinenge no vasimenge ne uxali laixe. La sou vasimenge uleme uxali tatila no anu xavi noxou Lataua.

20 ⁿTei la ngingi ngongi'a Kalisito ngesoli mo ngaxolu no laaxa'a ta uleenu e misaxila'u mimii e teitexi no loxotolo xe no lia 'o uasi. Ia tava'u loxovaa la sou ngingi ngamulimulinu lapuloto loxo ta mitema no lia 'o? Lapuloto e ngamulimulinu ne aloxo 'o, 21 “Natetelisou mamu, mo na'ou mamu, xe nakasou mamu.” 22 ^oLapuloto ilou lavulavu e ta mitema milosiengixu ane loxo ne molu noxi'a ta mitemasi sou mimii e tano'u xe taxaxai no anu la umamulo alaxu vilesisi. 23 Lapuloto ane loxo ne anu muxali no anu xavutala laixe, xo anu sou uavutilinenge no anu lalotu mo u'oxonenge tataloxolinenge xe ulosou vasimenge navunavu toxoxa'a. Ia lapuloto ne umomomo sou usu'ulinenge sou ukalusou masaxa masua sou opo teinu uasi.